What div ee hink aboot eet now that oov hed eet for a while? It's certainly a lot easier ti git parkeet. A tane a while ti git yaist ti the bit at the Toor Knowe, for a hink it was a bit dangerous the way ee crossed the traffic at first. Bit it didnae take is that lang ti git yaist ti eet.

They could dae wi mair or better signage at the Sandbed for there's still folk (frae outside the toon) thinkin' ee can gaun alang the High Street an endin' up gaun on a wild goose chase roond Slitrig Crescent and up throw Drumlanrig Square. Av seen lorries daen't. Mibees they're followin' their Satellite Navigation hings ee get nowadays, what is eet they ca' thum? Tom Toms? A thought that was a kind o' drum? A suppose it takes a while for that kind o' new information to git intae the system. A pal o' mei hes yin o' thame hings. Hei sticks eet ti the wundae when hei gauns oot in the car an' its right cliver. Div ee ken this, it tells ee where ti gaun when ee dinnae even ken where eer gaun yersel. A suppose that's the point mind.

A was gittin' a lift the other day an' hei hed eet on and hei was showin' is how it works. It was a right nice soondin' wummin whae kept saying "At the next roundabout take the second exit" or "At the next junction turn right" and that kin' o' hing. A was right impressed for a de ken how she could sei oo frae a' the way up there in a satellite. A'm telt ee can git different voices for thum ana. The wummin speakin' on ma freend's yin was awfi posh. Kinna like BBC English. A wunder if it's Valerie Singleton? Bit ee can get American, Australian, Irish and the like. There wasnae ony Scottish on the yin ma pal hed, though.

So A was thinkin', wad eet no be a guid idea ti hev yin in the Hawick tongue? Ee could hev the broad Hawick version "Dinni gaun doon there eel git hankeet, heed ower yonder insteed" or "A telt ee ti turn left ye dunderheed!" Or ee could even hev the Sandbed version. "Be careful driving on the next hill because it's gei steep" or "Turn left at the next roundaboot" (or even roondabout).

Speakin' o' which, that's yin thing that seems ti hev been affecteed be the new yin-way system, the roondaboots ur chowkeet a' the time.
The queue at the Station roondaboot is sometimes that long the traffic is stopeet a' the way up Wulton Hill. A de ken what ee dae aboot that, div ee? Bit somethin'll hev ti be duin for that's sharely no guid for gittin ony o' the threi 999 services doon in an emergency.