A was watchin' the bairn play wi a computer game the other day. No the kind o' computer A ken aboot, wi a box o' tricks that ee plug inti the wa, an' a telly screen that ee canni watch Coronation Street on.
Nut, this was juist a wee hing, nae big
ger than yer hand. It was beepin' away an' playin' wee tunes an' the bairn's thumbs were gaun ten ti the dizen, like how they div when they're sendin' texts.
Thone's another thing that's changed oor life, for better or for worser dependin' how ee look at eet. They tell mei that there's mair activity on the airwaves wi bairns textin' each other than there is wi folk speakin' ti each other. Whae'd have thought? Even Grannies er gittin' onti'd, textin' their grandbairns ti ask how they're gittin' oan. "How are you getting oan hen?" "no 2 bad gran how R U ?" What's that a' aboot? Eer no a cool granny if ee hevni got a mobile phone a'm telt.
Howts in ma day ee were cool enough juist ti hev a telly. An' a black an' white yin at that. Onyway, a was oan aboot the computer hing the bairn was playin'. Av nae idea what game was on eet, for the screen was that wee A couldni sei eet. Bit it wasni juist the thumbs that were gaun hell for leather, the hied was bobbin' fri side ti side and the shooders were dippin' ana'. What div ee ca' thum? A nintendo something or other. What grand toys the bairns hev nowadays.
They're spoilt for choice, er they no? Its the same wi the shows. They dinni seem si busy nowadays. A suppose wi a thame theme parks the bairns git ti, the shows must seem like a schuil open day. Mind, a hev ti admit, the shows de seem the same ti mei onymair either. Its a' blaw up fun hooses, full o' wund. A likeet the original Outer Limits masel. How niver, A'm bletherin'.
What aboot the games oo yaist ti git up ti? Div ee hink the bairns wad gee ee tippence for thum the day? It niver cost oo owt ti play kick the can. What fun oo hed though. An' niver mind theme parks wi thrill rides like roller coasters an' the like, oo hed a sheet o' cardboard ti gaun skeitin' doon the bankin' on. Thone was guid fun.
Except when yer hint end pairteed company wi the cardboard an' ee ended up wi a green backside an' landeed in a cows pat at the fit o' the hill. Usually ee were laughin' mind. An' off ee went, treckin' back up the hill so's ee could gaun skeitin' back doon again. A niver got seek o'd. At least no until it was time ti gaun hame for yer tei.
Div ee hink bairns wad git fun oot o' cardboard nowadays? Probably no unless its a box that they're nintento whatdiveecaud comes in. Still, A suppose thats fair enough.
