(mind, hevin' said that this is the first time this year av mentioned eet) Bit what a lot o' sna oov hed. Sna, sna, an' mare sna. A canni mind o' hevin is much for es lang, no for donkey's years.
How long ist since oov hed es much? Mind some folk
er delighteed. Av heard aboot folk sna-boardin' doon the vertish. Whativer that means.
An' whilst oo were fair chuffed wi oor portable ice skatin' rink at the Heart O' Hawick car park, oo wereni ti ken that juist rooond the corner the Teviot wad be frozen ower in places. Howts ee could juist aboot hev skateed ti the Spetch.
In fact, if it gauns oan for much langer eel can skate ti the Dunk, niver mind the Spetch. Cars hev been stuck. Av lost coont o' the number o' times A'v seen folk oot wi shovels an' nae suinner hev they cleared the way, an' oo git dumped oan be another snastorm.
This week the schuils were shut due to the weather. Mun what a cheer must hev went oot fri the bairns eh? A can juist sei eet. Usually, a mother hes an awfi job gittin' her bairns oot o' bed ti gaun ti schuil. They juist dinni want ti git up div they? "C'moan then, yer late, git a move oan." Oh nut mam, its fer ower cauld, a'm no feelin' weel, av got a sare belly. "Did A no tell ee no ti eat yelli sna!"
It'll've been a different story on Monday. "Nae Schuil the day, they've shut thum doon due ti the weather." Whoosh! The bairn wad be up in a flash and right past ee afore ee kent eet, doon the stair ti play wi whatever new gadget Santy brought thum for Christmas.
Aye, oov hed mare than juist a white Christmas. Oov hed a white New Year ana. In fact everything's white, includin' the roads. Usually when there's a lot o' sna the roads er still black for the gritters are aye oot wi the sa't.
Av seen thum oot an' aboot, the muckle big yins on the roads an' the wee yins on the pavements. Bit they hevni been able ti keep up wi the huge amount o' work they hev wi sic a bad wunter. An' there disni seem to be a lot o sa't scattered aboot for mony roads er still white.
Folk er sayin the cooncil hes run oot o' sa't. A seen the Fife cooncil on the news sayin' they'd run oot o sa't bit av niver heard ony official word that oor Borders cooncil hes, other than what folk on the street er sayin'.
The men hev been oot workin' hard in their larries wi ploughs on bit mibee they hevni ony sa't left. A wunder how that works. Nae doobt they budget a certain amount every year. An' this year hes been unusual so they've nae budget left. Or nae sa't left. Bit then what happens ti the left ower budget, or the left ower sa't, in the years when less is needed.
Is eet rolled ower ti save up for the bad years, so the average spend is aye the same? Hollyrood er tellin' oo there's plenty sa't in Scotland. Or should oo take that wi a pinch o' sa't?
