The word on the street this week is aboot the felli in Burnfit whae seemingly won a quarter o' a million on the lottery. It's even made the national newspapers.
A hev ti admit, A aye wondered aboot thone scratchcaird hings. A'd niver heard o' onybody ever actually won owt mare than enough ti git another scratchcaird.
It minds mei o' the days o' the pools. Ee mind o' yone? When ee yist ti try ti pick w
hat fitba matches wad end up in a draw? If ee got mare than eight draws ee were in the money.
Bit verra few folk ever did, unless it was yin o' thame weeks when there was hunners o' draws, bit then ee didni wun owt onywei.
Ee yist ti sei the wunners in the paper, some o' thum got famous for their wun. Yin in particular was mare famous than the rest. Viv Nicholson. Div ee mind o' her? They made a fillum aboot her an' everything.
A hunder an' fifty twae thoosant she won. A lot less than this fella hes won on the scratchcaird, though it was a lang time ago, so it was worth mare then.
Somebody says on the telly that what she won in nineteen sixty yin wad be the same es five million in the day's money. She said she wad spend, spend, spend. And afore lang it was spent spent spent.
A seen her gittin' interviewed on the telly and she was askeet what it was like ti be back where she sterteed. An' she niver blinked. She said A might be back where A sterteed, bit A hed a guid time on the way. Fair enough.
Mind it didni turn oot that way for other weel-kent wunners. Some couldni handle eet, some unfortunately hed some bad luck efter their guid luck, an' yet others lived happily ever efter (es they say in the fillums). A suppose there's es much variety in wunners is there is in life.
There was a story on the news aboot a man in Amairica that yist ti buy a lottery ticket every week for toonty years. An' yin day hei bought his ticket an' droppeet doon deed. An' when his wife checked the ticket, she fund oot hei hed won ten million dollars. Now, is that guid luck, or bad luck? A de ken.
Probably it was guid luck and bad luck baith at the same time. So they cancelled each other oot eh?
Mind, hei still deid so it was mare bad luck than guid luck for him, bit mibee no for his wife. A suppose it wad depend on how weel they were gittin' oan eh?
When it comes ti guid luck an' bad luck it's hard no ti wonder how it gits dished oot. Bit at the end o' the day, if ee want ti wun wi a scratchcaird, ee hev ti buy a scratch caird.
An' then A suppose eev the same chance es everybody else. No much chance. Bit how niver, here's wushin' guid luck ti everybody.
